Wiel Roeselers

Wiel Roeselers zet zich al jarenlang met hart en ziel in voor het plaatselijke verenigingsleven.


Wiel Roeselers
Wiel Roeselers

 

Daarvoor ontving hij al vele onderscheidingen waaronder een Koninklijke.
De Brunssummer kun je met recht een ware Limburger noemen.
Vanuit dat gevoel ontplooit Wiel steeds weer nieuwe succesvolle initiatieven met als doel het Limburgs cultureel erfgoed en met name het dialect, te behouden.

 

 

In ’t Limburgs.
In ’t Limburgs is en wurt hiel get gepubliceerd.
Zoe zien d’r aoje tekste, veul lokale woordebeuk en is d’r dialekliteratuur.


Sjtamcafé

’t Is de wermde
De miensjelikke toeën
Van hie zin
Ongedwonge, gewuën
Get breuzele
Dan weer serieus
Mer toch ummer
Luchtig, neet nerveus
Ooch neet te vrieblievend
Soms vuurzichtig fanatiek
De gesjprekke in mien sjtamcafé
Is dat neet sjiek?

Broenssem 15-08-2010
Wiel Roeselers

Broen Café

In ’n broen café
Gezellig aan de tieëk
Get ouwhoare, klessjeneëre
Aaf en toe gezump, gemieëk
Bliejheed, verdreet
Geloof, polletiek
Al kumt lngs
Wat is dat toch sjiek

Broenssem 09-05-2013
Wiel Roeselers

Broenssem 10 Huëveldurp

In Broenssem geet ’t hie en doa
Berg op en dan weer aaf
“Wie kint dat”; zag Frenske
Heë vroog ‘tzich wurkelik aaf
“Broenssem”, zag ich doe
In ganse wieze sjproak
Is geboed op 10 huëvele
En neëve jieëdere berg is ee loak

Der Klingberg is noe
Merkelbeëkersjtroat
Doa is joa ooch de Kling
Doa onge in dat loak

Der Klingelsberg, Broenssem-Noord
Hoe ’n nuuj durp de grondj oet sjoot
Mit winkelcentrum en Kennedylaan
Mi toetkiek op Genhoot

Drieë vier os om, op Heële aa
Kumst-e op der Kruutsberg oet
De sjtroat heesj nog ummer zoeë
Doe kieks doa uëver gans Broenssem oet

Der weeg lupt bis aan der Haansberg
Hoe koelhuuskes noe nog ligke
’t Is ’n besjermd durpsgezich
Zoeëwie ze huujedaags zigke

Teëge Heële ligkt der Langeberg
Es sjerm teëge Heëlesje windj
Vier zagte vreuger “achter de bruk”
Dat wit huuje daags geen kindj

Der Douvenberg ligkt der neëve
Koelterrein,noe Afcent plek
Der Ouverberg woar doa weer neëve
Kreeg koelsjtee op ziene nek

Gont vier dan de oosgrens noa
Trikke zoeë op Sjilvend aa
Sjtees te boave oppe Boewberg
En kins berg aaf oppe Oeloave aa

Doa onge i gen durp
Teëgenuëver Op Gen Hoes
Doa vings-te de Muëzeberg
Doa woar vreuger mer ’n inkel hoes

Lups te dan ’t centrum i
Dan vings te der Hokkeleberg
Versjtoake achter ’t poskantoer
Mer dat vingt heë neet erg

Doarom geet ‘t in Broenssem
Hie berg op en doa weer aaf
Al duje ze al vol betong
En breëke alle ouds aaf
Broenssem 11-08-2010
Wiel Roeselers

Zefke

´t Is ene apaarte miensj.
Dat woeёrd al ummer van Zefke gezag.
Es klene jong hub ich dat noeёts begrieёpe.
Vuur os woar heё alleen mer ´n kleen menke mit groeёte oeёre en ´n Belsj petsjke op.
Meestal hou heё ooch ene blauwe uёveral aa.
De boksepiepe en de erm get lank, mer dat makde Zefke nieks oet.
Dan koam heё aa getrampele doeёr gen durp of de gats aaf mit zien hundje, ziene hilligdom.
En dan hie en doa get breuzele of sjtute.
Of gans geїnteresseerd noa wirk kieke en zigke wie ´t mot gebuёre of wie ´t beёter zou kinne.
Dat woar wat Zefke geer deeg.
En went dan ene neet wol loestere; “dat doog neet, ich hub ´t dich gezag”, zag Zef dan ´n bietje koad.
En leep dan weer vlot wiejer om ´t smiddigs, of der daag der noa weer langs te lope en dan begos ´t sjpieёl weer van vuur af aa.
Zef kalde mit jieёdere en jieёderee kalde mit Zefke.
Jieёdere kalde uёver Zefke, mer Zefke kalde uёver nieёmes, ooch dat woar ´n versjil mit anger luuj.
Zef woar joa ene apaarte.

Zefke woar jonkgezil en wonde in ´t ouwesjhoes.
´n Oud huuske mit ´n bietje ´n sjeef daak.
Drachter loge ´n paar sjtelkes, ich dink in vreuger joare vuur ´n verkske en ´n paar hoonder.
Hoonder heel Zefke nog, mer geen verke mieё.
Dan hou heё nog ene koeёlhof, ene flinke gaard hoe van alle soorte greunte in getrokke woeёrdte.
Es Zefke ooch neet veuёl kos, mer doa kos heё waal get van.
En dat sjting der ooch umer good op!
Sjtekkeboeёne en breёkboeёne, eёrpel en moeёre, sjlaat en tomate en versjeije soorte kuёl en natuurlijk unne, prei en soppegreun.
Natuurlijk woar der ooch ene mishoop, vuur ´t greunaafval van de gaard
Dan woar der nog ´n sjop om get onge weg te zitte.
Dat sjop hau ooch ziene biste tied gehad.
´t Luёnde mieё teёge de sjtal op es dat ´t zelf sjtong.
De panne woare ooch neet te bis.
Hie en doa kapot en op inkele plaatsje woar der ooch een voert.
“Kiek”, zagte de luuj da, “Zefke hat ´n pan aaf!”.
Dat heё alleen wonde woar te zieёn aan de vinstere en gerdiene.
Later wie ich ooch al ´ns get op sjtap ging lieёrde ich Zefke get beёter kinne.
´t Woar mich ooch soms inne zulderos deё Zef.
Me kan neet zigke dat heё ze neet allenuij op de krisboom hou, mar heё woar toch get angesj, get apaart.

Zefke hau op de koel gewirkt en is daonoa neet mieё richzig aan de bak gekomme.
Heё kloemmelde hie en doa get en kloeёde wiejer heem get op zien ege geudje.
Went-ste heuёm doer gen durp zoogs lope dan versjroks ze dich soms.
In de nutste kleijer mit van die groeёte wappers van oeёre onge zien blesj petsjke oetsjteёkend koam heё dan aa getrampele.
En went ´t effe koos hie en doa get breuzele en vertille.
En Zef kos vertille, ongerwerpe zat!
Egaal hoe ieёmes ´t uёver hau, Zefke kos der van mit kalle.
Heё hau al mitgemak.
In jieёder geval dat vertilde heё.
De luuj zachte waal ´ns “ went Zefke van de ieёsjte luёge gebasjte woar, hau heё ziene ieёsjte luijer noeёts volgesjieёte.”
Ich vong neet dat heё loog, heё fantaseerde get gemekkelik.
Heё fantaseerde zoeё, dat heё zichzelf gelofde, heё woar joa ene apaarte..
´n Paar van zien fratse wil ich uch waal oet de deuk doeёn.

Heё vertilde mich ´ns in één gesjprek dat heё bie de SS gedeent, en bie de RAF gevloage hou.
Anger kieёre vertilde heё mich dat heё bekker woar geweё, of sjmieёd, heё koosj sjtruё daker make, mangele vlechte en asjperge sjteёke.
Joare hau heё onge in de zieё piepleidinge gelasj; “bhoa wat ´n werk woar dat”, zag Zefke dan.
Zefke vertilde geer en vong duks ´n gewillig oeёr.

Vuur de kirk sjtong Zefke ooch paraat.
Kirkcollectant sjpieёle of de bronk seёre, Zefke woar paraat.
Bie dat litste woar heё neet ummer gans neuchter.
Woar heё ´t zoaterdigs ´sjmiddigs zich effe ene goan drinke (heё kos joa neet te lang blieve
went om zus oeëre rammelde de wikker, bronk seёre! En ´n miensj moat toch get sjloape.) en hau heё al doezend kieёr gezag, “nog ene en dan goan ich”.
Evvel Zefke woar ene apaarte en bleef hange.
Went der kastelein ´m om veer oeёre eindelijk kwiet woar, sjokkelde Zefke op heem aa en drieёde zich aa gen duёr weer om, om richting vuurzitter van ´t comité te goan.
De bronk mot joa geseerd were.
Noaderhandj woar te zieёn hoe Zef geseerd hau.
Alle sjablone loge get oet ´t midde, der wil woar der waal mer ´t richtingsgeveul neet mieё gans.
Op ins sjteet heё rechop sjtikt ene frisj in der verfpot gesjtoake bokkepoeёt omhoeёg en begint
te zinge.
Wat hubbe vier nuij gelache, neet om dat komisje leёdje van Zefke, zoeёwie heё zelf dach, mer omdat heuёm de verf langs der buёsjtelsjtieёl aafleep, noa de moewe in.
En Zef zong mar “Hoojoo, hoojoo ene mens is niet van stro”.

Zefke koam al ´ns geer in de café.
Doa leёfde heё gans op.
Get kaarte deeg heё geёr.
Koajonge, pandoere of toepe, dan sjloog heё op der dusj dat ´t der duivel hoalde.
Heё trof der zien vrunj en kos kalle, noa kloemele zien leefste bezigheed.
Zefke kos ooch koad weёre.
Went get sjnuёzele minde heuёm vuur de gek te kinne houte, of heuёm ploagde mit zien oeёre.
Zefke kumt noeёts in de hieёmel woeёrd dan gezag, deё sjtuёt mit de oeёre de ingele om. Dan woeёrd heё zoeё nut wie ene knien.
Zefke deeg geen vleeg koad en wol ooch geen koad ervare.
En geliek hou heё natuurlik.
Mar gier wit wie de joegend soms kan zin, hoewaal me sommige groeёte ooch neet mot weggoeёje.
Zefke woar waal enen apaarte, maar heё wos wat leёve woar.
Heё deeg zien plich en hou zien sjpas.
Wos wat kos en neet kos en heel zich doa aa.
Dat heё ´ns get sjlodderde went heё oet de cafe koam, och dat is toch neet zoeё erg, heё deeg der joa gene koad mit.

Mit al zien doeёn en loate en mit al ziene kal heёt Zefke nog noeёts ieёmes koad gedoan; van veuёl gelieёrde luuj en nog mieё luuj die mene dat ze gelieёrd zin, kint me dat neet ummer zigke!

Wiel Roeselers

Water bie de wien

’t Woar ‘ns in ’n café
Zeët ene klant uëversjtuër
Wat bis-te noe aan ’t make
Deë drank is veuël te duur
Ich betaal dat neet
Nog neet missjien
En der kastelein,
Heë deech water bie de wien
Wiel Roeselers

Kassjtieële

Ich loos lits nog ‘ns
’t Book van pasjtoer
Missjien kint gier ’t waal
“Broenssem de ieëwe doer”
De kassjtieële van Broenssem
Der sjlopershamer heel der hoes
Der is nieks mieë van uëver
Es alleen get van Genhoes

’t Bexhoes of de Spieker
’t Bleef neet gesjpaard
Gelukkig bleef van ’t Heufke
Inne gieëvelsjtee bewaard

’t Hote kassjtieël van ridder Vos
Loog teëgenuëver de kirk
Mit gracht en mit bruk
Veulde heë zich doa sjterk

Van ’t Cluttelieën, onge i gen durp
Me neumde ’t ooch Rozegaard
Aan geen zie van de Sjilvenderweëg
Bleef alleen der naam bewaard
Brunssum 11-08-2010
Wiel Roeselers

Durpsfiguëre

Aan durpsfuguëre wie
Koale Berb of Zefke Zinke
Nulke Beckesj of Teun Versteeg
Kin ich mit plezeer aan dinke
Soms get rau of veuël fantasie
Zie doeërbroke de sjluër
Jieëder op zien ege maneer
Gove ze ’t leëve kluër


It's only fair to share...Print this page
Print
Share on Facebook
Facebook
Tweet about this on Twitter
Twitter
Share on LinkedIn
Linkedin
Share on Tumblr
Tumblr